அமித்ஷாவின் மதுரை விசிட், தேர்தல் நெருங்கும் நேரத்தில் புதிய புதிய அசைன்மென்ட் என முக்கியத்துவம் வாய்ந்ததாக உள்ளது. இன்னொரு பக்கம் பாஜகவுடன் கூட்டணி சம்பந்தமாக புதிய ஹின்ட் கொடுத்துள்ளார் ராமதாஸ். நம்பிக்கையோடு உள்ளது பாஜக.

அதே நேரத்தில், பாஜக முன்னெடுக்கும் ஆன்மீக மாநாடு உள்ளிட்ட அடுத்தடுத்த அஜெண்டாக்களை, தொகுதி மறு வரையறை அஸ்திரம் மூலமாக பதிலடியாக ஏவுகிறார் மு.க ஸ்டாலின்.

இங்கே பாஜகவுக்கு துணையாக எடப்பாடி உள்ளார் என்றும் துணை கனைகளையும் வீசுகிறார். இதையொட்டி, அதிமுக தரப்பில் இருந்தும் பதிலடிகள் வருகின்றன. உதயநிதியை நோக்கி அரசியல் குண்டுகளை வீசுகின்றனர்.

இந்த நிலையில், எல்லாவற்றையும் வேடிக்கை பார்க்கும் தவெக. முக்கியமாக 'அதிமுக, பாஜக, பாமக, தேமுதிக' என பல்வேறு கட்சிகளும் கூட்டணிக்காக காத்திருக்கின்றன 'ஆட்டம் நம் கையில் எனவே மாநாடு, சுற்றுப்பயணம், தொகுதி தேர்வு. இதில் தீவிரமாக பயணிப்போம்' என உற்சாகப்படுத்தியுள்ளார் விஜய்.

இரு நாட்கள் முன்பு ராமதாஸை சந்தித்தார் வேல்முருகனின் அண்ணன் திருமால்வளவன். பலரை கட்சியில் இணைத்து தம்மை பலமாக மாற்றி, அன்புமணியை ஓரங்கட்ட திட்டமிடலாம் என 'டெல்லி'-யும் எச்சரித்தது. அதன் பிற்பாடே பதறியடித்து தைலாபுரம் பறந்தார் அன்புமணி என்கிறார்கள்.

இன்னொரு பக்கம் மதுரையில் 'முருகன் மாநாடு' நடக்கவுள்ளது. இதை வைத்தும், ஒரு 5 முக்கியமான திட்டங்களும் வகுத்துக் கொடுக்கப்பட்டுள்ளது. இதை தீவிரமாக முன்னெடுக்க உள்ளார் நயினார். இதன் முன்னோட்டமாகவும், அமித் ஷா-வின் 'மதுரை விசிட்' இருக்கும் என்கிறார்கள் கமலாலய சீனியர்கள்

நீண்ட இடைவெளிக்குப் பிறகு ராமதாஸை சந்தித்து, சுமார் 45 நிமிடங்கள் உரையாடியுள்ளார் அன்புமணி. கட்சி, சொத்து விவகாரம் பேசப்பட்டது. 3 டிமாண்டுகளை ராமதாஸ் முன்வைத்தார் என்கிறார்கள்.

இன்னொருபக்கம் ஆடிட்டர் குருமூர்த்தி & சைதை துரைசாமி ஆகியோர், தைலாபுரத்தில் சுமார் 3 மணி நேரத்துக்கு மேலாக , ராமதாஸிடம் உரையாடியுள்ளனர். அமித் ஷா மதுரைக்கு வரும்போது, பாமக கூட்டணி உறுதியாகிவிட வேண்டும் என்பதற்கான மீட்டிங் என்றும் தகவல். இதில், உள்ளே இருந்து ஆடிட்டர் யாருக்கோ போன் போட்டுக் கொடுக்க, அதற்குப்பின் ராமதாஸ் முகம் மலர்ச்சி என்கிறார்கள் கமலாலய வட்டாரத்தினர்.